Askari ka tirsan Ciidanka Dowladda oo wiil dhalinyaro ah ku toogtay duleedka Muqdisho.

[Deeq A.]

Muqdisho (Caasimadda Online) – Askari ka tirsan ciidanka dowladda ayaa barqadii maanta wiil dhalinyaro ah ku toogtay wadada xiriirisa Muqdisho iyo Afgooye.

Wiilka la dilay oo magaciisa lagu sheegay Catoosh Xaaji Cali ayey ciidamada u toogteen sabab aan ilaa iyo hadda la aqoon iyadoo askariga dilka geystay uu goobta ka baxsaday sida la sheegay.

Goobjoogayaasha ayaa Caasimadda Online u sheegay in mid ka mid ah askarta ilaalada ka haya dhismaha wadada u dhaxeysa Muqdisho iyo Afgooye uu toogtay wiilka.

Ehelada wiilka ayaa gaaray goobta lagu dilay wiilkooda, waxeyna kasoo qaateen meydka iyadoo aan wax faah-faahin ah laga bixin dhacdadaan.

Wadada isku xirta Muqdisho iyo Afgooye ayaa dhismaheeda dib loo bilaabay shalay kadib muddo lix bilood ah oo hakad la galiyay.