Kulan Xasaasi Ah Oo Dhex-maray Madaxweyne Biixi Iyo Madax-dhaqameedka Reer Awdal Oo Natiijo La’aan Ku Soo Dhammaaday + Wararkii Ugu Dambeeyay

[Deeq A.]

(SLT-Hargeysa)-Madaxweynaha Somaliland Md. Muuse Biixi Cabdi ayaa kulan gaar oo saaka la qaatay Madax-dhaqameedka gobollada Awdal iyo Salel.

Kulan oo ka dhacay qasriga Madaxtooyadda waxa madaxweynaha ku weheliyay guddoomiyeyaasha xisbiyadda UCID iyo WADDANI, Madaxweyne ku-xigeenka Somaliland iyo wasiirro ka tirsan xukuumadda kana soo jeeda gobolka Awdal.

Kulanka muddo saacado ah socday ayuu Madaxweynaha Somaliland hor-dhigay salaadiinta codsi la xidhiidha sidii ay doorashooyinka golleyaasha wakiillada iyo deegaanku dalka uga dhici lahaayeen iyada lagu galayo saami-qaybsigii hore.

Salaadiinta gobolka Awdal ayaa ku kala qayb-samay codsiga Madaxweynaha waxaana ku gacan-saydhay qaar ka mid salaadiinta halka kuwo kale soo dhaweeyeen.

Wararka ay heshay shabakadda Somalilandtoday waxa ay sheegayaan in 4 suldaan ku gacan-saydheen codsiga Madaxweynaha halka ay laba Suldaana aqbaleen,

Kulan madaxweynaha iyo madax-dhaqameedka ayaa ugu dambayntii ku soo dhammaaday natiijo la’aan.

Madaxweyne ku-xigeenka Somaliland Md. Cabdiraxmaan Saylici oo ay weheliyaan qaar ka mid wasiiradda xukuumadda ayaa kulan hadhimo sharafeed ah la qaatay Madax-dhaqameedkan iyaga oo isku dayay inay ku qanciyaan in ka tanaasulaan arrinta saami-qaybsiga balse kulankaasina waxa uu ku soo dhammaaday natiijo la’aan.

Wararka ay helayso Somalilandtoday waxa ay sheegayaan in madaxweyne ku-xigeenka iyo madax-dhaqameedku ay u ballameen kulamo kale oo toddobaadkan gudihiisa ka dhici doona magaalada Boorama.

Madax-dhaqameedka ayaa isla maanta u kicitimay gobolka Awdal.

Source