Taliye odowaa oo ka bad-baaday qarax ka dhacay degmada Hodan

[Deeq A.]

Warar dheeraad ah ayaa ka soo baxaya qarax is-miidaamin ah oo duhurnimadii maanta ka dhacay qeybo ka mid ah degmada Hodan ee gobolka Banaadir.

Qaraxa oo ahaa mid xoogan ayaa waxaa lagu weeraray kolonyo uu la socday taliyaha ciidamada Xoogga dalka Soomaaliyeed, Janaraal Odawaa Yuusuf Raage oo marayay inta u dhexeysa isgoyska Tarabuunka iyo Isbitaalka Xoogga oo ku yaalla degmada Hodan.

Taliye Odowaa oo la hadlay warbaahinta dowladda ayaa xaqiijiyey in bartilmaameedka qaraxa uu isagu ahaa, balse ay fashiliyeen ciidamada ammaanka ee xilligaasi la socday.

Sidoo kale wararka ayaa sheegaya in gaariga qaraxa loo adeegsaday uu noociisu ahaa Saaruf laga soo buuxiyay waxyaabaha qarxa.

Inta la xaqiijiyey waxaa qaraxaasi ku dhintay is-miidaamiyihii gaariga waday iyo haweeney wadada mareysay, sida ay shaaciyeen saraakiil ka tirsan laamaha amniga Soomaaliya.

Xaaladda ayaa hadda degan, waxaana caadi ku soo noqday dhaq-dhaaqa ganacsiga iyo isku socodka meesha uu qaraxu ka dhacay.

View the full article