Ducaale oo xilka ka qaaday agaasimihii barnaamijka DRP ee Wasaaradda Amniga

[Deeq A.]

Muqdisho (Caasimada Online) – Wasiirka amniga Soomaaliya Maxamed Abuukar Islow Ducaale ayaa xilka ka qaaday agaasimihii barnaamijka dhaqan celinta isa soo dhiibayaasha shaqsiyaadka ka tanaasulay fikradaha argagixisada ee loo yaqaan DRP, Maxamed Cali Xuseen.

Maxamed Cali Xuseen ayaa xilka looga qaaday warqad uu Ducaale soo saaray 12-kii April 2020, waxaana wararka ay sheegayaan inuu xilka ku waayey is qab-qabsi Maamul.

Ilo-wareedyo ka tirsan wasaaradda amniga Soomaaliya ayaa sheegay in sababaha xilka qaadista agaasimaha ay ku timid kala duwanaasha xagga maamulka ah oo ay isaga wasiirka xilliyo kala duwan isku qabteen.

Maxamed Cali Xuseen ayaa xilka loo magacaabay August 2018.

Intii uu xafiiska joogay, waxa uu ku guuleystay hagaajinta xiriirka dowladda Dhexe iyo dowlad gobaleedyada oo maamul ahaan ku kala duwanaa mashruucan. Waxa uu si lamid ah soo celiyay kalsoonidii deeq bixiya-yaasha oo iyaga laftooda maamulladii isaga ka horreeyay ay ku kala tageen wax is daba marin iyo musuq maaliyadeed.

Shaqaalaha qeybaha xafiiska DRP waxaa ka jiray loolan xagga maamulka ah iyo kala xadid la’aanta howlaha hortabinta leh, laakiin waxa uu qaatay go’aamo lagu kala xaddidayo Barnaamijka Qaran ee Dhaqan Celinta Isa soo dhiibayaasha ka tanaasulay fikradaha argagixisada.

Hadda waxa uu leeyahay Mashruuca DRP Xeer iyo Habraacyo uusan ugu imaan Xafiiska muddadii 7-8 sano uu jiray.

Ma jirin sharciyad dowladeed oo uu leeyahay barnaamijka laakiin agaasimaha xilka laga qaaday waxa uu ku guuleystay in nuqul dhameystiran uu hor geeyay golaha Wasiirada lana ansixiyay December 2019.

Maxamed Cali Xuseen ayaa kamid ah dhallinyarada fara ku turiska ah ee dalka wax ku bartay.

Agaasimaha ayaa muddo kasoo shaqeynayay wasaaradda amniga isaga oo Agaasime ka soo noqday qeybaha kala duwan ee Wasaaradda Amniga.

Hoos ka arag warqadda xil ka qaadista