Sawirro: Guddi wasiiro iyo xildhibaano Hawiye ah oo u ambabaxay Baydhaba

[Deeq A.]

Baydhabo (Caasimada Online) – Guddi ka kooban 13 xubnood oo sgu jira Wasiiro iyo Xildhibanao ka tirsan dowladda Federaalka Soomaaliya ayaa waxaa ay u ambabaxeen Magaalada Baydhabo ee Xarunta Gobolka Baay.

Wafdigan ayaa ah Guddi ka kooban 13 xubnood oo habeen hore la magacaabay, kaddib markii ay shir isugu yimaadeen Wasiirada iyo Xildhibaannada ka soo jeeda Beelaha Mogadishu Clan ee cabashada ka keenay saamiga laga siiyay kuraasta Xildhibaannada Baarlamaanka Koonfur Galbeed.

Wafdiga ayaa waxaa hoggaaminaya Wasiirka Amniga Soomaaliya Xildhibaan Maxamed Abuukar Isloow Ducaale, waxaana kamid ah, Sanoter Cabdi Axmed Dhuxulow, Xildhibaan Daahir Amiin Jeesow, Xildhibaan Cabduqaadir Carabow iyo Xubno kale.

Ujeedada safarka xubnahan ka socda Beelaha Mogadishu Clan ayaa waxa ay tahay sidii Madaxweynaha Maamulka Koonfur Galbeed ay ugala soo hadli lahaayeen saamiga Beelaha Mogadishu Clan laga siiyay Kuraasta Xildhibaanada Koonfur Galbeed.

Beelaha Mogadishu Clan ayaa Kuraasta Xildhibaanada Baarlamaanka Maamulka Koonfur Galbeed waxa ay ku lahaayeen 20 Xubnood, balse waxaa hadda laga siiyay kaliya 9 Xubnood.

Tan iyo markii lagu dhawaaqey liiska Xildhibaannada Koonfur Galbeed ayaa waxaa cabasho ay ka imaaneysay qaar kamid ah Beelaha Soomaaliyeed,kuwaas oo sheegay in aan la siin Xubnihii ay ku lahaayeen Baarlamaanka Koonfur Galbeed.

Kulankii habeen hore ka dhacay Hotelka Maa’ida ayaa waxaa lagu gorfeeyay sidii qadiyadaha beesha loo xoojin lahaa, isla markaana kulamada soo socda ay u noqon lahaayeen mid joogto ah oo ay beeshu iska war-sato xaaladaha guud ee dalka ka jira, si isku duubni ku jirta loogu wajaho tabashooyinka gaarka ah ee beesha dhexdeeda ah.