Xildhibaano maanta la isku hortaagay Muqdisho iyo ‘arrin ay muddo qarinayeen’ oo ay shaaca ka qaadeen

[Deeq A.]

Muqdisho (Caasimada Online) – Xildhibaano ka tirsan baarlamanka Soomaaliya ayaa sheegay in ciidamada dowladda Soomaaliya ay maanta is-hortaag ku sameeyeen xilli ay shaqo ugu socdeen dhinaca garoonka diyaaradaha ee Aadan Cadde ee magaalada Muqdisho.

Xildhibaan Maxamed Cumar Dalxa oo ka mid ah xildhibaanadaas ayaa sheegay in bar kontorool oo ku taalla halka laga galo garoonka, kuna dhow Isgoyska KM4 loo diidey inay ilaaladooda kala gudbaan loona sheegay inay ilaalada halkaasi ku reebaan.

“Waxaan maanta la kulany wax aan horey u arag. Anaga oo shaqo qaran u socona ayaa nalagu joojiyey waddada KM4 ka baxda ee aadda garoonka, waxaa nalagu qasbay inaan ciidanka iska reebno, weliba ma ahayn ciidan badan oo ilaalo kooban ayey ahaayeen, xitaa ciidanka na joojiyey way aqoonsadeen inaan nahay xildhibaano,” ayuu yiri xildhibaan Dalxa.

Xildhibaan Dalxa ayaa sheegay in ciidanka joojiyey ay u sheegeen in lasiiyey amar, balse waxay diideen, buu yiri, inay sheegaan cidda amarka bixisay.

Waxaa uu hadalkiisa intaasi ku daray in go’aanka ciidamada uu u cuntami waayey, isla markaana ay go’aansadeen inay dib ugu soo laabtaan guryahooda kana joogaan shaqadii iyo shir ay ka qeyb-geli lahaayeen.

Dalxa ayaa sheegay in marka ay soo laabteen kadib ay la xiriireen taliska ciidamada, balse loo sheegay in arrintan wax laga qabanayo, oo sida uu yiri afka ah kaliya, balse aan waxba laga qaban dhacdadan.

Dalxa ayaa dhinaca kale sheegay in maalmahan ay socoto qorshe ay muddo qarinayeen, oo aysan ka hadlin, kaasi si dadban looga qaadayey ciidamada ilaalada u ah, oo loogu yeeray diiwaan-gelin iyo arrimo kale, balse kadib aan dib loogu soo celin, sida uu hadalka u dhigay.

“Waxa socda uma aan bogin, wax badan ayaan ka xishoonay oo aan qarineynay arrintan, yaa waayey cidda amnigeena sugaysay haddii askarigii baxaba ee loo yeero aan dib loo soo celineyn,” ayuu yiri Dalxa.

Hoos ka dhageyso wareysiga Dalxa

https://www.caasimada.net/wp-content/uploads/2020/03/Wareysi-Dhalxa.mp3