Booliiska gobolka Bari oo mar kale sheegay in ay qabteen dad hubaysan

[Deeq A.]

Rasaasta RPG-7

Taliska qeybta Booliiska gobolka Bari, oo maalmihii u dambeeyay hawlgallo ka waday magaalada Boosaaso, ayaa mar kale sheegay in ay soo qabteen, dad haystay Rasaasta Qoriga loo yaqaan RPG-7.

“Taliska Ciidamada Booliska Gobalka Bari ayaa howl galadii ka socday magalada bosaso ku soo qab qabtay rasaasta qoriga loo yaqaano 7ka iyo dadkii haystay kuwaasi oo la rabay in lagu khal khal galiyo amniga magalada bosaso.” Ayaa lagu yiri qoraal ka soo baxay Taliska Booliiska gobolka Bari.

Sidoo kale, waxay sheegeen in ay soo qabteen dad guryahooda hub ku haystay, islamarkaana iyaga iyo hubkooda dhowaan la soo bandhigi doono, inkastoo aysan faahfaahin ka sii bixin.

“Ciidamada ayaa sido kale soo qabtay hub kala duwan kuwaasi oo dhawaan la soo bandhigi doono iyo dadkii hubkaasi guryahooda ku hayay.” Ayaa qoraalka la sii raaciyay.

Taliska ayaa sidoo kale Shacabka ka codsaday, in ay kala shaqeeyaan xaqiijinta Amniga iyo fududaynta Hawlgallada ka socda magaalada Boosaaso.

PUNTLAND POST

The post Booliiska gobolka Bari oo mar kale sheegay in ay qabteen dad hubaysan appeared first on Puntland Post.