Maraykanka oo faahfaahin ka bixiyay duqeymo uu ka fuliyay gobolka Shabeellada Hoose

[Deeq A.]

Taliska Ciidamada Maraykanka Qaaradda Afrika ee loo yaqaanno AFRICOM ayaa faahfaahin ka bixiyay duqeyn dhanka cirka ah oo ay ka fuliyeen gobolka Shabeellada Hoose taasi oo lala beegsaday Al-shabaab.

Qoraal ka soo baxay AFRICOM ayaa lagu sheegay in Ciidamada Mareykanka oo kaashanaya Saaxiibadooda Soomaaliya ay shalay oo ku beegneyd 2/3/2020 ay laba duqeyn oo dhinaca cirka ah ka fuliyeen degaanka Kuunya-Barroow ee gobolka SHbaeellada Hoose.

Taliska ayaa sheegay in Weerarkaas lagu dilay hal xubin oo ka tirsan Al-shabaab halka laba kalena lagu dhaawacay inkastoo aysan sharraxaad dheeriya ka bixin xubnaha la dilay magacyadooda iyo xilalka ay ka hayeen Al-shabaab midna.

AFRICOM ayaa sidoo kale xusay in aysan dad rayid ah wax ku noqon  duqeymaha ay ka fuliyeen degaanka Kuunya-Barrow ee gobolka Shabeellada Hoose isla markaana uu sii wadi doono howlgallada ka dhan ah Al-Shabaab si loo wiiqo awoodooda.

PUNTLAND POST

The post Maraykanka oo faahfaahin ka bixiyay duqeymo uu ka fuliyay gobolka Shabeellada Hoose appeared first on Puntland Post.