Erdogan Iyo Putin Oo Xal U Raadinaya Xiisadda Suuriya

[Deeq A.]

(SLT-Ankara)-Madaxweynha Turkey Recep Tayyip Erdogan ayaa Khamiista booqan doona Russia, si uu madaxweyne Vladimir Putin ugala xaajoodo xiisadda sii kordheysa ee ka taagan Syria, waxaa sidaas maanta sheegay xafiiskiisa.

“Madaxweynaha waxa uu booqasho hal maalin ah ku tagi doonaa Russia, 5-ta March,” waxaa sidaas bayaan ku yidhi madaxtooyada Turkey.

Turkey ayaa Axadii xaqiijisay inay billowday howl-gal millatari oo ka dhan ah ciidamada Syria ee Russia ay taageerto kadib isku dhacyo xooggan oo ka dhacay gobolka Idlib.

Ankara, oo taageerta dagaal-yahanada Islaamiga ah ee gobolka, ayaa 19 askari oo Syrian ah ku dishay duqeymo ay ku fulisay diyaarado aan cidna wadin Axaddii, waxayna soo ridday laba diyaarad oo uu maamulka Syria leeyahay.

Hase yeeshee waxaa ka go’an inay ka fogaato isku dhac toos ah oo dhex-mara ayada iyo Moscow, oo ay wadaagaan xidhiidh ganacsi iyo mid millatari oo weyn.

Xiisadda hadda taagan ayaa ka dartay toddobaadkii tegay kadib markii 34 askari oo Turkish ah lagu dilay duqeymo cirka ah oo lagu eedeeyey xukuumadda Damascus.

AFP

Source