Ciidamada DF oo hub kala baxay guriga wasiirka amniga Jubbaland

[Deeq A.]

Muqdisho (Caasimada Online) – Faah faahinno dheeraad ah ayaa ka soo baxaya howlgal ballaaran oo xalay ciidamada dowladda federaalka Soomaaliya ay ka sameeyeen qeybo ka mid ah degmada Doolow oo ka tirsan gobolka Gedo ee K/ Soomaaliya.

Howlgalka oo ahaa mid qorsheysan ayaa waxa ay ciidamadu ku galeen hoyga wasiirka amniga Jubbaland, Cabdirashiid Xasan Nuur (Janan) oo ku yaalla gudaha degmadaasi.

Saraakiil ka tirsan kuwa milatariga Soomaaliya oo la hadlay warbaahinta ayaa sheegay inay gacanta ku soo dhigeen laba qoray oo ah kuwa loo yaqaano BKM-ka iyo kuwa kale.

Sidoo kale waxay intaasi ku dareen in guriga Wasiir Janan ay kala soo baxeen rasaas nuucyadeeda kala duwan, sida ay hadalka u dhigeen.

Ilo deegaanka ah ayaa sidoo kale inoo sheegay in ciidanka baaritaanka waday ay isku geedaameen guriga inta uu socday howlgalka, iyaga oo markii dambe isaga tegay halkaasi.

Illaa iyo hadda lama oga sababta rasmiga ah ee dambeysa howlgalkaasi lagu beegsaday hoyga wasiirka amniga maamulka Jubbaland oo baxsad ka ah dowladda dhexe, kaas oo hadda ku sugan qeybo ka mid ah magaalada Mandera ee gobolka Waqooyo Bari, Kenya.

Si kastaba ha’ahaatee xiisad iyo dhaq dhaqaaqyo milatari oo u dhexeeya labada dhinac ayaa si xoogan maalmihii ugu dambeeyey looga dareemayey gobolka Gedo, gaar ahaan degmada Beled-Xaawo oo aty isku hor fadhiyaan ciidanka dowladda iyo kuwa Jubbaland.