Qoor Qoor oo kulan xasaasi ah la qaatay hoggaamiyaha Ahlu Sunna

[Deeq A.]

Dhuusamareeb (Caasimada Online) – Madaxweynaha maamulka Galmudug, garabka dowladda Mudane Axmed Cabdi Kaariye Qoor ayaa xalay kulan gaar ah la qaatay hoggaamiyaha guud ee Ahlu Sunna Waljamaac Macalin Maxamuud Sheekh Xasan.

Kulanka oo ka dhacay xarunta madaxtooyada Galmudug ee Dhuusamareeb ayaa waxaa looga hadlay arrimo xasaasi ah, gaar ahaan dagaalladii ka dhacay magaaladaasi.

Sida ay innoo xaqiijiyeen ilo ku dhow kulankaasi Qoor Qoor ayaa ugu horreyn hoggaanka Ahlu Sunna ku amaanay tanaasulka ay muujiyeen, wuxuunta tilmaamay in taasi ay soo afjareyso khilaafaadka in muddo ah hareeyay maamulka Galmudug.

Sidoo kale wuxuu intaasi ku daray in labada dhinac ay iska kaashaan doonaan ka shaqeynta horumarinta deegaanada Galmudug iyo arrimaha dib u heshiisiinta.

Dhankiisa Macalin Maxamuud Sheekh Xasan oo madasha ka hadlay ayaa sheegay in haatan wixii ka dmabeeya ay si dhow ula dhaqeyn doonaan hoggaanka sare ee dowlad goboleedka Galmudug, si looga gudbo marxalada adag ee uu ku jiro maamulkaasi.

Isbedalka cusub ee Galmudug ayaa yimid, kadib markii dagaal qaatay ku dhowaad 24-saac looga adkaaday hoggaanka Ahlu Sunna Waljamaaca, taas oo shalay hoggaamiyaheedu uu shaaciyey inuu ka tanaasulay guud ahaan arrimaha siyaasadda ee maamulkaaasi.