Golaha Shacabka oo dib u ansixiyay wax-ka-beddelka Sharciga Jaan-goynta iyo Tayo-dhowrka Dalka

[Deeq A.]

Golaha Shacabka Baarlamaanka Federaalka Soomaaliya, ayaa maanta ansaxiyey wax-ka-beddel ay Golaha Aqalka sare ee Baarlamaanku ay ku soo sameeyeen Sharciga Jaan-goynta iyo Tayo-dhowrka Soomaaliya oo ay hore u ansaxiyeen Golaha Shacabku.

Xildhibbaanada Golaha fadhiyey, ayaa dhammaantood ba cod aqlabiyad ah ku meel-mariyey sharcigaasi, waxaana sidaas looggu gudbinayaa Xafiiska Madaxweynaha Dowladda Federaalka Soomaaliya Maxamed Cabdullaahi Farmaajo, si uu u soo saxeexo.

Wasiiru-dawlaha Wasaaradda Ganacsiga iyo Warshadaha Xukuumadda Federaalka Daahir Cabdi Cabdullaahi oo goob-joog ka ahaa fadhigii lagu ansaxinaayey Sharcigan, ayaa u mahad-celiyey guud ahaan Xildhibbaanada labada Gole ee Baarlamaanka Federaalka Soomaaliya, waxaana uu sheegay in sharcigani uu ahmiyad weyn u lee yahay dalka isla mar ahaantaana ay ka Wasaarad ahaan ku dedaali doonaan siddii loo hir-gelin lahaa ka dib marka uu saxeexo Madaxweynaha Qaranka Soomaaliya Mudane Maxamed Cabdullaahi Farmaajo.

Sharcigan, ayaa abuuraya hay’adda Tayo-dhowrka Soomaaliya oo ilaalin doonta tayada badeecadaha iyo waxyaabaha kale ee dalka gudahiisa lagu isticmaalayo, kuwa la dhoofinayo iyo weli ba kuwa laga keeno dalka dibaddiisa. Waxaana uu wax weyn ka tari doonaa bad-qabka caafimaad ee qofka Soomaaliga ah sida oo kale wuxu fududeyn doonaa Ganacsiga dalkeena oo uu Ganacsatadeena u sahli doono in si fudud loogga aqbalo suuqyada Caalamka maadaama markii hore ay dhibbaato kala kulmi jireen la’aanta sharcigan Jaan-goynta iyo Tayo-dhowrka Soomaaliyeed.

PUNTLAND POST

The post Golaha Shacabka oo dib u ansixiyay wax-ka-beddelka Sharciga Jaan-goynta iyo Tayo-dhowrka Dalka appeared first on Puntland Post.