Maxay ka wada-hadleen madaxweynaha Jubaland iyo Wefdiga Maraykanka?

[Deeq A.]

Madaxweynaha dowlad goboleedka Jubbaland Axmed Maxamed Islaam ayaa maanta Magaalada Kismaayo ku qaabilay Safiirka dowlada Maraykanka u qaabilsan Soomaaliya Donald Yamamoto iyo Taliyaha howlgalka Africom Gen. Stephen J. Townsend.

Qoraal ka soo baxay madaxtooyada Jubaland ayaa lagu sheegay in Safiirka iyo Madaxweynuhu ay ka wada hadleen Xaalada ka taagan gobolka Gedo iyo duulaanka gardarada ah ee dowlada Federaalka ah ay ku qaaday degaano nabdoon kuwaas oo tan iyo xiliga dowladu ay halkaas Weerarka ku qaaday ay ka jirtay Xaalada adag islamarkaana la isku raacay in dowladu ay halkaas kala baxdo Ciidamada ay gaysay kuwaas oo kala dhantaalay nidaamkii maamul ee halkaas ka jiray sidoo kalana khalkhal amni daro ka abuuray gobolka Gedo.

Qoraalka ayaa intaasi raaciyay in sidoo kale kulanka diirada lagu saaray sidii xal looga gaari lahaa khilaafka u dhexeeya dowlad goboleedka Jubbaland iyo dowlada Federaalka ah lana isku raacay in ay muhiim tahay in xal laga gaaro Khilaafkaas mudada ragaadiyay wada shaqaynta dowlada Federaalka ah iyo dowlad goboleedyada dalka.

Dhinaca kale kulan gaar ah oo dhex maray madaxweyne Axmed Maxamed Islaam iyo Taliyaha howlgalka Africom Gen. Stephen J. Townsend waxaa lagaga hadlay sidoo loo bilaabi lahaa howlgal midaysan oo Al-Shabaab lagaga saarayo degaanada ay kaga sugan yihiin Jubbaland howlgalkaas oo Si wadajir ah ay u fulinayaan Ciidamada dowlad goboleedka Jubbaland Ciidamada dowladda Federaalka iyo AMISOM oo ay tageerayaan Ciidamada howlgalka Africom ee Maraykanka.

The post Maxay ka wada-hadleen madaxweynaha Jubaland iyo Wefdiga Maraykanka? appeared first on Puntland Post.