Dowladda Federaalka oo qaban-qaabisay kulan ku saabsan Maqaamka Muqdisho

[Deeq A.]

Magaalada Muqdisho waxaa maanta lagu qabtay Kulan wadatashi ah oo ay soo qaban-qaabisay  Wasaarada Arrimaha Dastuurka Xukuumadda Federaalka, kaasi oo looga doodayo maqaamka magaalada Muqdisho ku dhex yeelanayso Nidaamka Federaalka iyo dib-u-eegista Dastuurka KMG ah ee dalka.

Kulankaasi dooda ah, ayaa waxaa ka qeyb galay wasiirro iyo xildhibaano katirsan dowladda Federaalka, guddoomiyaha gobolka Banaadir ahna duqa magaalada Muqdisho , guddoomiye ku xigeenada maamulka gobolka Banaadir, qaar kamid ah Agaasimayaasha dowlada hoose ee Xamar iyo xubna ka socday beesha caalamka.

Guddoomiyaha gobolka Banaadir ahna duqa magaalada Muqdisho mudane Cumar Maxamuud Maxamed (Cumar Filish) oo madasha ay dooda ka socotay  ka hadlay ayaa sheegay in ay ka shaqeynayaan sidii loo astayn lahaa maqaamka Muqdisho.

Wasiirka Wasaaradda Arrimaha Dastuurka Xukuumadda Federaalka Saalax Axmed Jaamac oo furay kulankani ayaa sheegay in  dib u eegista Dastuurka ay ahmiyad siin doonto maqaamka muqdisho.

kulanka oo ay ka soo qeybgaleen khubarro Soomaali ah, ayaa waxaa lagu soo bandhigi doonaa qaababka jira ee ay caasimadaha dunida ee federaalka ah ku dhisanyihiin si loo xusho qaabka ku haboon Muqdisho.

PUNTLAND POST

The post Dowladda Federaalka oo qaban-qaabisay kulan ku saabsan Maqaamka Muqdisho appeared first on Puntland Post.