Sawiro: Al-shabaab oo Ceeldheer ku caleemo saartay Suldaanka cusub ee Beesha Waceysle

[Deeq A.]

Ceeldheer (Caasimadda Online) – Kooxda Al-Shabaab ayaa Magaalada Ceeldheer ee Gobolka Galgaduud ku caleema saartay Suldaan cusub oo ay yeelaneyso Beesha Waceysle ee Abgaal kaasoo kamid ahaa odayaashii taageersanaa kooxdaas.

Kulankaan oo ay si weyn usoo diyaarisay kooxda Al-Shabaab isla markaasna ay ka qeyb galeen Odayaasha Dhaqanka, Haweenka, Dhallinyarada iyo Ardayda deegaanka Ceeldheer ayaa waxaa Suldaanka Beesha Waceysle loogu doortay Daa’uud Xasan Aadan.

Suldaan Daa’uud Xasan ayaa maamuli doono Deegaanka Ceeldheer oo ay gacanta ku hayaan Kooxda Al-Shabaab, waxaana xafladda lagu caleema saaray kasoo qeybgalay qaar ka tirsan guddoomiyaasha deegaanada ay gacanta ku hayaan Al-Shabaab.

Odayaashii Waceysle ee kasoo qeybgalay Xafladda oo u badnaa kuwa taageersan Al-Shabaab ayaa sheegay inay garab taagan yihiin kooxda Al-Shabaab isla markaasna ay ku midoobeen Suldaanka cusub.

Al-Shabaab ayaa Suldaanka cusub guddoonsiisay Kitaabka Qur’aanka, Calan, Qori iyo booshkiisa iyo Gaari Prado ah iyadoo faras lagu dhex mariyey Magaalada Ceel Dheer.