Dowladda Kenya oo soo saartay digniin ka dhan ah ganacsatada lacagta siiso Al-Shabaab

[Deeq A.]

Nairobi (Caasimadda Online) – Dowladda Kenya ayaa soo saartay digniin culus oo ka dhan ah dad ay sheegtay inay lacago siiyaan Al-Shabaab taasoo u fududeyso inay weeraro ka geysteen gudaha dalkeeda.

Fred Matiani’e oo ah  Wasiirka Amniga gudaha Kenya ayaa xusay in Dowladda Kenya ay isha si gaar ah ugu heyso dad uu sheegay inay dhaqaale siiyaan kooxda argagixisada ee Al-Shabaab ee ka dagaalanto Soomaaliya iyo Kenya.

Wasiirka ayaa sheegay inay Dowladda Kenya si adag ula xisaabtami doonto dadkaas isla markaasna ay jiraan liis dad dhaqaale siiyo Al-Shabaab oo ay ku raad joogaan.

Sidoo kale Wasiirka ayaa sheegay inay ciidamada Kenya si gaar ah bartilmaameed uga dhigan doonaan ganacsato uu sheegay inay xuduuda Kenya iyo Soomaaliya soo mariyaan ganacsi Kontara baan ah kadib hadal uu ka jeediyey shir looga hadlayey amniga Gobolka Soomaalida.

Wasiirka ayaa kooxaha sida sharci darada ah wax u dhoofiyo ugu goodiyey inay ku qaban doonaan gacan bir ah isla markaasna ay wadaan baaritaan ay wax badan ku ogaadeen.

Wuxuu sheegay inay hadda xoogga saari doonaan sidii ay ula dagaalami lahaayeen kooxo uu ku sheegay inay maalgeliyaan kooxda Argagixisada ee Al-Shabaab.

Ugu dambeyntii Wasiirka ayaa dadka Soomaalida ka codsaday inay si dhow ula shaqeeyaan ciidamada Booliska ay looga hortago weerarada sii badanayo oo ay Al-Shabaab ka geysaneyso Gobolka Soomaalida.

Hadalka Wasiirka ayaa imaanayo kadib markii kooxda Al-Shabaab ay sare u qaaday weerarada ay ka fuliso gudaha Kenya, waxaana deegaano ka tirsan Kenya ka bilowday barakac ay sameenayaan dadweynaha iyagoo ka cabsanayo weerarada Al-Shabaab.