Al-Shabaab oo amar dul dhigay beelo dagaalkooda la xallin waayay sanado badan

[Deeq A.]

Cadale (Caasimada Online) – Waxaa si rasmi ah u dhaqan galay amar ka soo baxay dagaalamayaasha Al-Shabaab, kaas oo ku wajahnaa dagaalkii maleeshiyo beeleedka u dhaxeeyay ee ka socday degaanka Burdheere oo ka tirsan degmada Cadale.

Dagaalkaan oo kii ugu dambeeyay dhacay bishii Marso ee sanadkii hore ayaa tan iyo wixii markaas ka dambeeyay ku jiray Al-Shabaab oo laba jeer kulmiyay odayaasha dhaqanka ee labada beel.

Sida ay qaar ka mid ah odayaasha u sheegeen Caasimada Online, Al-Shabaab ayaa ku amray odayaasha in la joojiyo dagaalka iyo dilka, cidii u hogaansami weysana ay ka qaadi doonaan talaabo adag. Sidoo kale Al-Shabaab ayaa u sheegay odayaasha in ay soo gudbiyaan khasaaraha kala gaaray kadibna sida lagu xalin doono ay go’aamin doonaan Al-Shabaab.

Wararka ayaa sidoo kale sheegaya in kaliya xogta khasaaraha aysan soo gudbin doonin dhinacyadii dagaalamay balse ay dhankooda baari doonaan Al-Shabaab.

Al-Shabaab ayaa sheegay in muddo sanad ah lagu dhameen doono muranka degaanka islamarkaana ay Al-Shabaab sameyn doonaan soodinta dhulka la isku haysto.

Labada beel ayaa u hogaansamay amarka Al-Shabaab, waxaana hadda si nabad ah ay ugu wada nool yihiin goobihii lagu dagaalamay laakiin waxaa ka mamnuuc ah isticmaalka waxyaabihii uu dagaalka ka bilaawday.

Dhaq dhaqaaqa ay dowladda Soomaaliya kawado degaanka Xaaji Cali nawaaxigiisa ayaa la sheegay in uu yahay mid salka ku haayo dhaq dhaqaaqa Al-Shabaab ee beelaha ka dhaxwadaan iyo soo gelitaanka Al-Shabaab ee degaanka Geelgub oo ilaa hadda ay haystaan.

Dowladda Soomaaliya iyo maamulka HirShabelle ayaa hore ugu guul dareestay in ay xaliyaan dagaalkaan oo muddo dheer soo jiray kaas oo sababay khasaaro dhimasho iyo dhaawac iyo bur bur hantiyadeed.