Maareeye cusub oo mar kale loo magacaabay garoonka diyaaradaha Boosaaso

[Deeq A.]

Madaxweynaha Puntland Siciid Cabdullaahi Deni ayaa mar kale Maareeye cusub u magacaabay garoonka diyaaradaha magaalada Boosaaso.

Madaxweyne Deni ayaa Axmed Siciid Yuusuf u magacaabay Maareeyaha cusub ee garoonka diyaaradaha Boosaaso, kadib muddo lix bilood ah oo xilkaas hayey Maareeye uu horey ugu magacaabay.

Madaxweynaha Puntland ayaa bishii July ee sanadkii hore Axmed Maxamuud Xaaji Yuusuf u magacaabay Maareeyaha garoonka diyaaradaha Boosaaso.

Maareeyihii hore Axmed Maxamuud ayaa noqonaya masuulkii ugu horreeyey inta la ogyahay oo Madaxweyne Deni magacaabay, hadana xilka ka qaaday.

Garoonka diyaaradaha Boosaaso ayaa dhammaadkii sanadkii hore lagu wareejiyay dowladda Imaaraadka Carabta.

Hoos ka akhriso digreetada magacaabista

Madaxweynaha Dowladda Puntland Mudane Siciid Cabdullaahi Deni ayaa Xeer Madaxweyne Lr.13 January 16, 2020, ku magacaabay Maareeyaha Garoonka Diyaaradaha ee Boosaaso.

Madaxweynaha Dowladda Puntland.

Markuu arkay: Dastuurka Dowladda Puntland Qodobkiisa 80-aad.

Markuu arkay: Baahida loo qabo horumarinta Garoonka Diyaaradaha Boosaaso

Markuu arkay: Aqoontiisa, kartidiisa iyo waayo-aragnimadiisa shaqo.

Markuu tixgaliyay: Talo soo jeedinta Wasaaradda Duulista Hawada iyo Garoomada Dowladda Puntland

Wuxuu xeeriyey:

1. Waxaa Axmed Siciid Yuusuf loo magacaabay Maareeyaha Garoonka Diyaaradaha ee Boosaaso.

Xeerkani wuxuu dhaqan gelayaa markuu Madaxweynuhu saxiixo, wuuna saxiixay.

=DHAMMAAD=

PUNTLAND POST

The post Maareeye cusub oo mar kale loo magacaabay garoonka diyaaradaha Boosaaso appeared first on Puntland Post.