Maxay ka wada-hadleen madaxweynaha Puntland iyo safiirka Maraykanka?

Deeq A. · January 11, 2020

Madaxweynaha dowladda Puntland, Siciid Cabdullaahi Deni oo ku sugan magaalada Boosaaso ee xarunta ganacsiga Puntland, ayaa xarunta madaxtooyada Boosaaso ku qaabilay Safiirka Maraykanka ee Soomaaliya Ambassador Donald Yamamoto iyo wefdi uu hoggaaminayo.

“Madaxweynaha Dowladda Puntland Mudane Siciid Cabdullaahi Deni ayaa maanta qaabilay Safiirka Dowladda Mareykanka ee Soomaaliya Ambassador Donald Yamamoto iyo wafdi uu hoggoominayo oo booqasho ku yimi Boosaaso” ayaa lagu yiri qoraal ka soo baxay madaxtooyada Puntland oo looga warbixiyay kulanka.

Qoraal ayaa sidoo kale lagu sheegay, in madaxweynaha iyo safiirku, ay kulankooda uga wada-hadleen, arrimo ay kamid yihiin xiriirka Puntland&Maraykanka, la’dagaallanka Argagixisada, xaaladda guud ee siyaasadda Soomaaliya dhaqaalaha iyo deyn cafinta.

“Madaxweynaha Dowladda Puntland Mudane Siciid Cabdullaahi Deni iyo Safiirka Dowladda Mareykanka ee Soomaaliya Donald Yamamoto, waxay ka wada hadleen arrimo ay ka midyihiin xiriirka Mareykanka iyo Puntland, la dagaalanka argagixisada, xaaladda guud ee siyaasadda Soomaaliya, dhaqaalaha iyo deyn cafinta Soomaaliya.”