In ka badan 170 ruux oo ku dhintay Diyaarad ku dhacday dalka Iran

[Deeq A.]

In ka badan 170 ruux ayaa ku dhintay, kadib markii ay burburtay diyaarad laga leeyahay waddanka Ukraine daqiiqo kadib markii ay ka duushay Garoonka Diyaaradaha Imam Khomeini oo ku yaalla magaalada Tehran ee caasimadda waddanka Iran.

Diyaaradda oo nooceedu yahay Boeing 737, ayaa sidday 176 ruux , kuwaasi oo 167 kamid ah ay Rakaab ahaayeen, halka 9-ka kalena ay shaqaale ahaayeen, waxaana ay  ku sii jeeday caasimadda Waddanka Ukraine Kiev.

Madaxweynaha waddanka Ukraine, Volodymyr Zelenskiy oo warbaahinta la hadlay, ayaa sheegay in ay rumaysan yihiin, in dhammaan ay geeriyoodeen Rakaabkii iyo Shaqaalihii saarnaa Diyaaradda burburtay, isagoo tacsi u diray qoysaskii ay ka baxeen dadkii ku dhintay shilkaasi.

Dowladda Iran ayaa dhankeeda shaacisay in Rakaabkii iyo Shaqaalihii saarnaa Diyaaradda burburtay la rumaysan yahay in ay wada-dhinteen, waxaana ay xustay in cillad farsamo, ay  wajahday Diyaaradda daqiiqado kadib markii ay ka kacday Garoonka Diyaaradaha Imam Khomeini ee magaalada Tehran.

PUNTLAND POST

The post In ka badan 170 ruux oo ku dhintay Diyaarad ku dhacday dalka Iran appeared first on Puntland Post.