Bosaso: Maxkamadda Ciidamada Puntland oo dil ku xukuntay askar horay dilal u gaystay

[Deeq A.]

Maxkamadda sare ee Ciidamada Qalabka Sida iyo Denbiyada Culus ee dowladda Puntland, ayaa maanta dil toogasho ah ku xukuntay saddex askari oo ka tirsanaa Ciidamada Puntland oo lagu helay in ay dileen askar iyo sarkaal Ciidan.

Axmed Aaden Maxamed (Gaagaale) oo lagu helay in uu dilay Taliyihii Saldhiga Booliiska ee Garoonka Diyaaradaha Boosaaso, G/sare Xassan Shire Ammaan oo horay dil loogu xukumay, ayaa Maxkamaddu mar kale ku ridday dil toogasho ah.

Sidoo kale, Ayaanle Maxamed Cabdi oo horay u dilay askari kale, islamarkaana dil ku xukunnaa, ayaa isna Maxkamaddu mar kale dil toogasho ah ku ridday. Axmed Maxamed Muuse oo ka tirsanaa Ciidanka PMPF, horayna u dilay askari kale, ayaa isna mar kale lagu riday xukun toogasho ah.

Dhinaca kale, Cabdulqaadir Axmed Maxamed oo ka tirsanaa Ciidamada Puntland, horayna magaalada Boosaaso ugu dilay nin ka soo jeeda dalka yemen, ayaa isna lagu xukumay in uu bixiyo Mag dhan 100-halaad oo geela, kadib markii ay Yemeniyiinta sheegeen in ay Mag ka qaadanayaan.

Ugu dambeyntii, Cabdulqaadir Ayaanle Maxamed oo isna si Kamma’ qof shacab ah ugu dilay magaalada Boosaaso, ayaa Maxkamaddu ku xukuntay in uu bixiyo Magta qofkii uu dilay.

PUNTLAND POST

The post Bosaso: Maxkamadda Ciidamada Puntland oo dil ku xukuntay askar horay dilal u gaystay appeared first on Puntland Post.