Mareykanka oo dilay jeneraal laf-dhabar u ahaa ciidamada Iran

[Deeq A.]

Mareykanka oo dilay jeneraal laf-dhabar u ahaa ciidamada Iran

Jeneraal Qasem Soleiman

Dowladda Mareykanka ayaa xaqiijisay in ay duqeyn dhanka cirka ah ku dishay Jeneraal Qasem Soleiman oo ahaa madaxa cutub kamid ah ciidamada ilaalada kacaanka ee dalka Iran oo lagu magacaabo Quds.

Ciidamada Quds ayaa ah ciidan qaabilsan hawlgalada dibadda, kana tirsan ciidamada dalka Iran.

Wasaaradda gaashaandhiga ee Mareykanka ayaa sheegtay in Qasem Soleiman ay ku dileen duqeyn dhanka cirka oo ka dhacday meel aan ka fogeyn garoonka diyaardaaha ee Baqdaad ee dalka Ciraaq.

Telefishenka Dowladda Ciraaq ayaa sidoo kale baahiyay in Jeneraal Soleimani uu kamid ahaa dhowr qof oo lagu dilay duqeymo dhanka cirka ah.

Sarkaal katirsan Dowladda Mareykanka ayaa wakalaadda wararka ee Reuters u sheegay in ay fuliyeen duqeynta, laguna bartilmaameedsaday kooxo taabacsan Iran.

Xoogaga taabacsan Iran ee Popular Mobilisation Forces ee dalka Ciraaq ayaa sidoo kale wakalaadda wararka ee Reuters u sheegay in Jeneraal Soleimani iyo hogaamiyaha maleeshiyaad Ciraaq ka dagaalama oo lagu magacaabo Abu Mahdi al-Muhandis la dilay.

Dilka Jeneraalkan ayaa dadka darsa arrimaha bariga dhexe waxay aaminsan yihiin in ay dhalin doonta xiisad horleh, lagana yaabo in Iran ay qaado tallaabo aargoosi ah.

Jeneraal Suleimani waxaa uu laf-dhbar u ahaa Dowladda Iran, waxaana ciidamadiisa Quds ay si toos ah uga amar qaataan hogaamiyaha ruuxiga ee Iran, Ayatollah Ali Khamenei.

Weerarkan ayaa dhacay maalmo un kadib markii dad dhigayay dibadbax ay isku gedaameen safaaradda Mareykanka ee caasimadda Baqdad, kuwaas oo ay isku dhaceen ciidanka Mareykanka ee jooga dhismaha safaaradda.

Wasiirka difaaca ee Mareykanka, Mark Esper ayaa gelinkii dambe ee shalay sheegay in Mareykanka aanu aqbali doonin weerar lagu qaado shaqaalahiisa jooga gobolka, wuxuuna dalka Iran ku eedeeyay rabshadihii ka dhacay safaaradda.

“Weerar nagu la soo qaado waxaa uu la kulmi doonaa jawaab xilligeeda leh” ayaa lagu sheegay war qoraal ah oo ka soo baxay wasaaradda gaashaandhiga ee Mareykanka.

Waxaa kale oo uu Mareykanka dalka Iran ugu baaqay in ay soo afjaraan hawlaha ay ka wadaan dhismaha safaaradda Mareykanka ee Baqdad.

Madaxweynaha Mareykanka Donald Trump ayaa horay ugu gooddiyay Dowladda Iiraan, ka dib markii uu ku eedeeyay inay ka dambeysay weerarkii lagu qaaday safaaradda Mareykanka ee dalka Ciraaq.

Dhismaha saraafadda ee Magaalada Baqdaad ayaa waxaa weerar ku qaaday dad mudaharaadeyaal ah oo ka careysnaa geerida maleyshiyaad lala beegsaday weerarro ay diyaaradaha Mareykanka fuliyeen.

Mr Trump ayaa qoraal uu soo dhigay bartiisa Twitter-ka ugu hanjabay Iiraan, isagoo sheegay “inay magdhow ka bixin doonto” khasaare kasta oo ka dhasha halkaas ama dhimasho.

“Tani ma aha digniin, waa hanjabaad”, ayuu ku yiri qoraalkiisa.

Hase yeeshee, hoggaamiyaha sare ee Iiraan, Ayatollah Ali Khamenei oo hadalkaas ka jawaabay ayaa sheegay in Mareykanku “uusan waxba ka qaadi karin Iiraan”.

Wuxuu sidoo kale sheegay in naceybka ka dhanka ah Mareykanka uu ku fiday meel kasta oo ka mid ah dalka Ciraaq.

Tehran ayaa beenisay inay wax lug ah ay ku lahayd weerarkii lagu qaaday safaaradda Mareykanka ee Magaalada Baqdaad.

Qaran News