Amarkii Villa Somalia ee ka dhanka ahaa xildhibaanada iyo wasiirada la beddelay

[Deeq A.]

Muqdisho (Caasimada Online) – Waxaa dib wadada hormata madaxtooyada Soomaaliya loogu fasaxay Xildhibaanada Baarlamaanka Soomaaliya, xubnaha Golaha Wasiirada iyo saraakiil kale oo dhawaan laga xanibay in ay ilaaladooda la maraan agagaarka madaxtooyada.

Taliska Milateriga Soomaaliya iyo saraakiisha madaxtooyada ayaa isku raacay in Xildhibaanada iyo wasiirada ay istaafkooda la mari karaan wadada hormarta madaxtooyada, balse aysan la soo dhaafi karin albaabka Kashmiir oo ah kontaroolka ugu horreyo ee laga galo darbiga ku wareegsan dhismaha madaxtooyada, sidoo kalane ka soo horjeedo hoteelkii la wareeray ee SYL.

Arrintaan ayaa ka dambeysay dood maalmihii la soo dhaafay ka taagneed magaalada Muqdisho, arintaas oo sababtay in loo yeero wasiirka Gaashaandhigga iyo Taliyaha ciidamada Xoogga Soomaaliya Jeneral Odowaa Yuusuf Raage.

Odawaa ayaa sheegay in tallaabadan loo qaaday in amniga lagu adkeeyo kadib weerarkii Hotel SYL oo ay fuliyeen maleeshiyo labisan dharka ciidamada dowladda.

“Xildhibaanada sharafta leh waxaan habeen iyo maalin u taaganahay waa adinka amaankiina khalad waa dhici karaa markii shaqo lagu jiro, waxaad la socotaan koonaha SYL waa dhacdadiid shanaad oo ka dhaceysa, waxaad la socotaan dhamaantood waxay u dhaceen sidii dhacdadii habeen dhaweed, dad isusoo akeysiiyey ciidamada amniga oo lugeynaaya ayaa hoteeladii gudaha u galay, sidaas darteed waa la kala garan waayey, sababta ay ragaas meesha ku yimideena waxay aheyd ciidamadii istaafyada u ahaa masuuliyiinta markii ay soo gaaran iridka dhamaantood halkaas ayaa lagu dajiyaa istaafyada isma garanayaan qofka soo dhax galana lama garan karo” ayuu Baarlamaanka ka hor yiri Jeneraal Odawaa.

Si kastaba, Villa Somalia ayaa la kulantay cadaadis badan dhowrkii maalmood ee la soo dhaafay markii uu amarkaan soo baxay, sidoo kale waxaa jirtay walaac dhanka amaanka ah oo laga qabay ciidamada loo diiday in ay halkaasi maraan, kaas oo ah inuu yimaado isku dhac ciidan oo marar badan lagu sigtay.