Ahlu-sunna oo Loo Saxiixay in 20 Xildhibaan Ku Yeelato Galmudugta Cusub

[Deeq A.]

Dowladda federaalka ah ee Soomaaliya ayaa kooxda Ahlu sunna kula heshiisay in golaha wakiilada laga siiyo ilaa 20 xildhibaan.

Qoraal ka soo baxay wasaaradda arrimaha gudaha waxaa lagu sheegay in xildhibaannaasi ay qeyb ka yihiin 89-ka xildhibaan ee guud ahaan golaha uu ka kooban yahay iyada oo xilheyntooda ay ku egtahay muddada xilheynta baarlamaanka cusub.

Dhinaca kale, waxaa heshiiskan soo dhoweeyey xildhibaan Mahad Salaad isaga oo bartiisa Faceboogga ku soo qoray “Waxaan soo dhawaynayaa heshiiska laga gaaray kala aragti duwanaanshihii dowlada federaalka iyo Ahlu Suna ee dhismaha Galmudug.

“Waxaan u mahadcelinayaa Ra’iisul Wasaaraha Xukuumada Federaalka Soomaaliya Xasan Cali Khayre oo waqti badan geliyay sidii arintaan loo xalin lahaa. Waxaa sidoo kale u mahadcelinayaa Wasiirka Arimaha Gudaha, Xildhibaanadii iyo Ganacsatadii ka shaqeeyay in uu miro dhal noqdo heshiiska maanta la gaaray”.

Guddiga doorashada Galmudug ayaa ku guuldareystay jadwalka iyada oo todobaadkan ay aheyd in ay socoto xulista xildhibaannada si ugu dambeyn ay doorashada madaxtinimada u dhacdo 23-ka bishan.

Goobjoog News

Source: goobjoog.com