Xeer Ilaaliyihii Guud ee Qaranka oo xilkii laga qaaday iyo masuul kale oo loo magacaabay

[Deeq A.]

Madaxweynaha dowladda Federaalka Soomaaliya Maxamed Cabdullaahi Farmaajo ayaa Xeer Ilaaliyohii Guud ee Qaranka Axmed Cali Daahir xilkii ka qaaday, wuxuuna xilkaas u magacaabay Garyaqaan Suleymaan Maxamed Maxamuud.

War qoraal ah oo ka soo baxay Madaxtooyadda Soomaaliya ayaa lagu sheegay in magacaabistan ku timid soo jeedintii Guddoomiyaha Maxkamadda Sare ee JFS Garyaqaan Baashe Yuusuf Axmed, baahida loo qabo in la dardargeliyo hawlaha dib u habeynta garsoorka iyo xaqiijinta hannaan cadaaladeed oo hufan oo ka dhaqangala guud ahaan dalka.

Madaxweyne Farmaajo ayaa faray Xukuumadda, una jeediyay Hay’adaha Sharci-dejinta in ay soo dhameystiraan Golaha Adeegga Garsoorka, lana waafajiyo Dastuurka ku meel Gaarka ah iyo Xeerarka khuseeya dhismaha Golahan, si loo dhammeystiro dib u habeynta garsoorka iyo hannaanka cadaaladeed ee dalka.

Madaxweyne Farmaajo ayaa kula dardaarmay Xeer Ilaaliyaha Guud ee la magacaabay in uu waajibaadkiisa shaqo u guto si waafaqsan dastuurka iyo shuruucda kale ee dalka u yaalla, uuna shacabka Soomaaliyeed ugu adeego si hufan oo caddaaladi ku dheehantahay.

Madaxweyne Maxamed Cabdullaahi Maxamed (Farmaajo) ayaa uga mahadceliyay Xeer Ilaaliyihii hore ee Qaranka JFS Mudane Axmed Cali Daahir shaqadii uu u soo qabtay dalka iyo dadaalkii uu muujiyey muddadii uu ahaa Xeer Ilaaliyaha Guud ee Qaranka.

PUNTLAND POST

The post Xeer Ilaaliyihii Guud ee Qaranka oo xilkii laga qaaday iyo masuul kale oo loo magacaabay appeared first on Puntland Post.