Wasiirka gaashaandhigga Ciraaq oo dacwad ugu hanjabay warbaahinta Sweden+Sababta

[Deeq A.]

Wasiirka gaashaandhigga Ciraaq oo dacwad ugu hanjabay warbaahinta Sweden

 

Wasiirka gaashaandhigga dalka Ciraaq Najah al-Shammari (52-jir) ee shalay ay hadalhaysay qaar ka mid ah warbaahinta Sweden iyo kuwo dibedda ah ayaa waxaa uu iminka ugu hanjabay warbaahintaasi dacwad iyo maxkamad.

Najah al-Shammari ayaa waxaa soo wajahday fadeexad kadib markii ay warbaahintu soo ogaatay in uu lacag jirro ka qaato isagoo xil sare ka hayo xukuumadda Ciraaq.

Wasiirkan ayaa la sheegay in uu dalka Sweden qoxooti ahaan isaga dhiibay sannadkii 2009-kii, isagoona baasaboorka weyn ee dalkaasi qaatay sannadkii 2015.

Iminka ayuu lasoo xiriiray wasiirku qareen ku sugan gudaha dalka Sweden kaas oo uu ku wargeliyay bal in uu qiimeeyo in uu dacwad ku furi karo warbaahintii fadeexadda ka baahisay, waxaa uu sidoo kale wasiirku ugu hanjabay dacwad warbaahin carbeed oo warkan sii faafisay.

Qoraal ay barta Facebook soo dhigtay wasaaradda gaashaabdhigga Ciraaq ayaa lagu cambaareeyay wararka “been abuurka ah” ee wasiirka laga faafiyay, waxaana lagu sheegay in ujeedkeedu ahaa in lagu qod-qodo, sumcaddana looga dilo wasiirka.

Tan iyo markii ay wararkani soo ifbexeen ayaa waxaa wasiirka gudaha dalkiisa kasoo food-saaray culeys siyaasadeed, waxaana lagu haystaa sida xil loogu magacaabay isaga oo baasaboor dal kale haysta, dabcan sharciga Ciraaq ayaa diidaya in xil dowladda looga magacaabo ruux haysta baasaboor dal kale.

Warbaahin dhowr ah oo gudaha Sweden ka jira ayaa qoray in wasiirkan oo xilka loo magacaabay isla sannadkan loo haysto dambiyo ay ka mid yihiin in uu musuq-maasuq ku sameeyay lacagta la siiyo dadka xanuunsan ee ay dowladda Sweden bixiso.

Waxa uu xanuunsanaa muddo sanooyin ah, oo waxaa uu lumiyaa xusuusta, sida uga diiwaangashan hay`adaha caafimaadka dalka Sweden.

Sidoo kale waxa lagu haystaa wasiirkan in isaga iyo qoyskiisaba ay qaadanayeen lacagaha loogu talo galay dadka carruunta leh iyo kuwa laga caawiyo guryaha xilli ay dalka Swedan ka maqnaayeen in muddo ah, ayna u sheegin dowladda.

Wararku waxa ay sheegayaan in sannadkii 2015 mar loogu xiray Sweden arrimo musuq-maasuq.

Qaran News