Ciidammo militari ah oo loo daabulay jaamacadaha ku yaal Itoobiya+Rasaas laga maqlaayo Diridhaba

[Deeq A.]

Ciidammo militari ah oo loo daabulay jaamacadaha ku yaal Itoobiya

Dowladda Itoobiya ayaa ciidammada militariga u daabushay jaamacadaha kala duwan ee ku yaal gobollada Amxaarada iyo Oromada si loo joojiyo qalalaasaha hareeyay jamacadahaas.

Sabtidii waxay rabshado ka dhaceen jaamacadda Woldiya ee ku taal gobolka Amxaarada, waxaana halkaas lagu dilay 2 ardey kaddib markii qowmiyadaha qaar uu dagaal ku dhexmaray halkaas.

Waxaan sidoo kale rabshadaha ku dhaawacmay 12 ardey.

Wararka waxay sheegayaan in rabshadaha ay sidoo kale ku faafeen jaamacado kale oo ku yaal Itoobiya.

Itoobiya waxaa kusoo batay rabshado u dhexeeyo qowmiyadaha qaar ee wada dego dalka labadii sanno ee lasoo dhaafay, waxaana ka barakacay in ka badan 2 milyan oo qof, sida ay sheegtay Qaramada Midoobey.

Horraantii bishan ayay aheyd markii, maamulka Tigreega uu shaaca ka qaaday in ardeyda kasoo jeeddo halkaas aanan loo dir doonin jaamacadaha ku yaal gobolka Amxaarada.

Rasaas laga maqlayo magaalada Dhirdhaba

Magaalada Dhirdhaba

Wararka ka imaanayo magaalada Dhiridhaba ee bariga Itoobiya ayaa sheegaya in hadda magaalada laga maqlayo rasaas xooggan kaddib markii rabshado ay halkaas hareeyeen.

Dad goobjoogayaal ah oo ku sugan Dhirdhaba ayaa BBC u sheegay in xiisad ay ka taagan tahay halkaas, rabshadaha waxay u dhexeeyaan qowmiyadaha Oromada iyo Amxaarada.

Waxaana hadda magaalada la geeyay militariga Itoobiya si ay xiisadda u dejiyaan kaddib markii booliska ay ku guuldareysteen inay ka hortaggaan colaadda.

Goobjoogayaal ayaa sidoo kale BBC u sheegay in dhimasho ay jirto balse aan la xaqiijin karin khasaaraha rasmiga ah ee ka dhashay rabshadahaas.

Rabshadahan ayaa imaanaya kaddib markii dhawaan ardey kasoo jeeddo gobolka Oromada lagu laayay jaamacadda Waldiya oo ku taal gobolka Amxaarada, waxaana weerarkaas ku dhintay 2 ardey halka 12 kalena ay ku dhaawacmeen.

Qaran News