Farmaajo oo lagula taliyey inuu laba arrin midkood ku xaliyo xaaladda Jubbaland

[Deeq A.]

Muqdisho (Caasimada Online) – Waxaa isa soo tarayaa talooyinka loo jeedinayo madaxweynaha Soomaaliya Maxamed Cabdullaahi Farmaajo, kuwaas oo ku saabsan dejinta iyo xal u helista xaalada sii xumaaneysa ee maamulka Jubbaland.

Siyaasiin, aqoonyahaano iyo masuuliyiin ka tirsan golayaasha Baarlamaanka iyo Xukuumadda ayaa la sheegay in madaxweyne Farmaajo kala hadleen xaaladda Jubbalanad islamarkaana ay siiyeen talooyin ku aadan xaaladda Jubbaland.

Talooyinka loo soo madaxweyne Maxamed Cabdullaahi Farmaajo ayaa ka koobnaa laba qodob sida ay noo sheegeen masuuliyiin ka tirsan xubnihii la kulmay madaxweyne Farmaajo.

Caasimada Online ayaa heshay xog ku saabsan talooyinka madaxweynaha loo soo jeediyay oo kala ah.

1) – In madaxweyne Maxamed Cabdullaahi Farmaajo uu tago magaalada Kismaayo kadibna uu ogolaado doorashadii ka dhacday Kismaayo lana heshiiyo Jubbaland, isagoo qiranaya in uu qalad ka dhacay labada dhinac haddana la saxayo.

2) – Iyo in uu casilo xubno ka tirsan Golahiisa Wasiirada, gaar ahaan wasiirka Arimaha Gudaha Soomaaliya kuna eedeeyo wixii qalad ah oo dhacay oo uu isaga iska fogeeyo kadibna uu ogolaado doorashadii wixii sixid u baahana laga saxo Jubbaland.

Madaxweynaha Soomaaliya Maxamed Cabdullaahi Farmaajo ayaa la sheegay in uu qaatay talooyinkii loo soo jeediyay balse lama hubo in uu fulin doono iyo inkale.

Dowladda Soomaaliya ayaa la sheegay in ay fadeexad kala kulantay khalaasaha ka jira Jubbaland waxaase loogu baaqay in ay dib u eegis ku sameyso arrinta Jubbaland taas oo ku xiran maslaxaddda Soomaaliya.

Caasimada Online
Xafiiska Muqdisho
caasimada@live.com