Al-Shabaab oo war kasoo saartay qaraxyadii Danab iyo “tirada askarta ay ku dileen”

[Deeq A.]

Muqdisho (Caasimada Online) – Ururka Al-Shabaab ayaa sheegtay mas’uuliyadda labo qarax oo galabta duleedka koonfureed ee magaalada Muqdisho loogu geystay kolonyo gaadiid ah oo ay wateen ciidamo ka tirsan militariga Soomaaliya, gaar ahaan kuwa Danab.

War kasoo baxay Al-Shabaab ayaa lagu sheegay in qaraxyadaas oo ahaa kuwo is xigxigay ay ku dileen 16 askari kuna dhaawaceen 15 kale, sidoo kalana ay ku gubeen labo gaari oo sida ay sheegeen goobta ku bas-beeshay.

Deegaanka Xaawo Cabdi ee dhaca inta u dhaxeysa Muqdisho iyo degmada  Afgooye ee gobolka Shabeellada Hoose ayaa lagu sheegay warka Al-Shabaab in qaraxyadaas ay ka fuliyeen.

“Qaraxyo is xigxigay ayey mujaahidiintu ciidamo uu tababaray Mareykanku kula beegsadeen deegaanka Xaawa Cabdi ee duleedka magaalada Muqdisho, waxaa ku dhintay ugu yaraan 16 karirsan maleeshiyaadka ay carbisay dowladda Mareykanka dhaawaca cadowga gaarayna waa 15 halka 2 gaari ay goobta ku basbeeleen” ayaa lagu yiri war ka soo baxay Al-Shabaab.

Markii laga soo tago sheegashada Al-Shabaab majiro wali wax war ah oo kasoo baxay dowladda Soomaaliya iyo talisyadeeda ciidanka oo ku aadan qaraxyadii galabta lala beegsaday askar ka tirsan ciidamada ugu tayada badan dowladda ee Danab.

Qaraxaas galabta lala eegtay ciidamadaas ayaa ku soo aadaya iyadoo todobaadkaan ay Al-Shabaab ku dhiiradeen in ay weeraraan saldhigga ku yaalla garoonka Ballidoogle oo ay daganyihiin ciidamo iskugu jira Soomaali, AMISOM iyo kuwo Ameerikaan ah, wallow saraakiisha ciidamada ku sugan saldhigaas ay sheegeen in gabi ahaanba la laayay Shabaab-kii weerarkaas qaaday iyagoo geysan wax khasaare ah.

Caasimada Online
Xaafiiska Muqdisho
Caasimada@live.com