In ka badan 20 xubnood oo la sheegay in Al-shabaab looga dilay gobolka Shabeellada hoose

[Deeq A.]

Ciidamada dowladda Federaalka Soomaaliya iyo kuwa Midowga Midowga Afrika (AMISOM) ee ku sugan gobolka Shabeellada hoose ayaa fiidnimadii xalay duqeyn ku dilay saraakiil ka tirsan Al-shabaab sida ay soo werisay warbaahinta dowladda.

Duqeynta ayaa sida la sheegay waxa laga fuliyay nawaaxiga degmada Awdheegle ee gobolka Shabeellada hoose kadib markii ay Ciidammadu ka war heleen in ay goobtaas isku urursadeen dagaallamayaal ka tirsan Al-Shabaab ah oo doonayey in ay weerar ku qaadan gudaha degmadaasi Awdheegle.

Warbaahinta dowladda Soomaaliya ayaa taliska ciidamada ku sugan Awdheegle waxay ka soo xigatay in duqeynta lagu laayay in ka badan 20 saraakiil iyo dagaallamayaal ka tirsan Al-shabaab oo uu kamid yahay ku xigeenka Horjoogaha Jabhadaha Al-Shabaab Xasan Abshir Jabriil oo magaciisa Xarakiga ah yahay (Xasan Jiiroow).

Sarkaalka magaciisa lagu sheegay Xasan Jiiroow ayaa sida la sheegayo waxa uu hogaaminayey dhawr weerar oo Al-Shabaab horey ugu qaadeen degaanno ay ka mid yihiin Janaale iyo Bariire oo gobolka Shabeelada Hoose ka tirsan.

PUNTLAND POST

The post In ka badan 20 xubnood oo la sheegay in Al-shabaab looga dilay gobolka Shabeellada hoose appeared first on Puntland Post.