Nuucyo ka mid ah dareeska ciidamada dowladda oo Muqdisho laga mamnuucay

[Deeq A.]

Muqdisho (Caasimada Online) – Taliska Ciidamada Booliiska, Milateriga, Nabad Sugidda iyo Asluubta Soomaaliya iyo masuuliyiinta kale ee Qaranka ayaa isku raacay in 2 nuuc oo kamid ah dareeska Ciidamada Soomaaliya aan la isticmaali karin kadib kulamo ka dhacay Muqdisho.

Kulamadaan oo kii ugu dambeeyay ka qayb galay Madaxweynaha Soomaaliya Maxamed Cabdullaahi Farmaajo, ayaa ka dhacay xarunta Madaxtooyada Soomaaliya iyadoo sidoo kale kulankaasi laga soo saaray digniin culus.

Dharkaan oo laba nuuc ka kooban ayaa isugu jira cadaan boor ah oo u muuqaal eg dharka Ciidamada Milateriga Sacuudiga iyo nuuca kale oo ah isla naqshadaas oo cadees ah.

Dharkaan ayaa sidoo kale waxaa loo yaqaanaa dareeska Ciidamada Xasilinta, waxaana horey loogu qaybiyay Ciidamadii gaarka ahaa ee Xasilinta balse waxaa hadda la sheegay in Al-Shabaab ay heystaan dharkaas waliba in badan oo kamid ah uu gacanta u galay.

Dhinacyada kulanka yeeshay ee soo saaray go’aankaan ayaa sidoo kale go’aamiyay in Askartii lagu arko la qabto hadii ay diidaan qabashana la toogan karo.

Afarta talis ee Ciidamada Soomaaliya ayaa lagu wargeliyay in ay fariintaan gaarsiiyaan Ciidamada Soomaaliya islamarkaana dharkaas magaalada iyo guud ahaan dalka looga saaro muddo 30 cisho gudahood.

Inkastoo ay hadda ka soo wareegatay dhowr maalmood hadane wali waxaa socoto wargelinta Ciidamada iyadoo wararka qaar ay sheegayaan in Taliyaasha qaar ay gacantooda ku gubeen dharkaan inta laga soo aruuriyay Xeryaha Ciidamada.

Al-Shabaab ayaa inta badan si fudud u hela dareeska Ciidamada Soomaaliya waxaana hadda la sheegaa in ayba helaan dharkii ugu dambeeyay ee loo qaybiyay Ciidamada Soomaaliya, gaar ahaan Ciidanka  Booliiska dalka, ayada oo aysan caddeyn sida ay u helaan.

Caasimada Online
Xafiiska Muqdisho
caasimada@live.com