Wasiirkii hore ee arrimaha dibedda Soomaaliya oo maanta lagu dilay qarax

[Deeq A.]

Muqdisho (Caasimada Online) – Waxaaa isasoo taraya khasaaraha dhimasho iyo midka dhaawac ee ka dhashay qarixii is-miidaaminta ahaa ee maanta ka dhacay Bar-koontorool oo Ciidamada dowladda ku leeyihiin agagaarka Taalada Daljirka Daahsoon ee degmada Boondheere.

Dadka mas’uuliyiinta ahaa ee qarixii maanta ku geeriyooday ayaa waxaa ka mid ah Xuseen Ceelaabe Faahiye oo ahaa Wasiirkii Arrimaha Dibadda dowladdii KMG aheyd ee uu Madaxweynaha ka ahaa Cabdullaahi Yuusuf Axmed.

Alle ha u naxariistee Marxuumka ayaa haatan ahaa la-taliye ka tirsan Wasaaradda Arrimaha Dibadda Soomaaliya, waxaana xilal kala duwan uu kasoo qabtay dowladihii dalka soo maray, isaga oo soo shaqeeyay xilli adag.

Qarixii maanta ka dhacay magaalada Muqdisho ayaa sidoo kale dadkii ku dhintay waxaa ka mid ahaa saraakiil ciidan, askar iyo shacab intaba.

Kooxda Al-Shabaab oo sheegatay mas’uuliyadda qaraxa ayaa tiri in lala beegsaday kolonyo baabuur ah oo ay la socdeen saraakiil iyo xildhibaano kusii jeeday madaxtooyada Soomaaliya.

Caasimada Online
Xafiiska Muqdisho
caasimada@live.com