Ciidamada UGANDA oo khasaare lagu gaarsiiyey qarax ka dhacay MARKA

[Deeq A.]

Marka (Caasimada Online) – Warar dheeraad ah ayaa waxaa laga helayaa khasaaraha rasmiga ah ee ka dhashay qarax xoogan oo ciidamo ka tirsan howlgalka ATMIS, gaar ahaan kuwa Uganda lagula beegsaday duleedka magaalada Marka ee xarunta gobolka Shabeelaha Hoose.

Qaraxa oo ahaa nooca miinada dhulka lagu aaso ee laga hago meelaha fog-fog ayaa ciidamadaasi lala eegtay, xilli ay marayeenj bartamaha magaalada, waxaana qaraxu haleelay mid ka mid ah kolonyada ay wateen ciidamada dowladda Uganda.

Wararka ayaa sheegaya in qaraxaasi lagu dilay ugu yaraan 5 askari oo ka tirsanaa ciidamada Uganda ee ATMIS, halka ay ku dhaawacmeen tiro kale oo intaasi ka badan.

Ilo deegaanka ayaa sidoo kale u sheegay Caasimada Online in qaraxa, kadib ay rasaas  fureen ciidamada la qarxiyey oo markii dambe sii watay socdaalkooda.

Taliska guud ee howlgalka ATMIS ayaa xaqiijiyey jiritaanka weerarkaas qaraxa ah, balse kama hadlin khasaaraha soo gaaray ciidamadooda.

Dhanka kale Al-Shabaab ayaa sheegatay mas’uuliyadda qaraxan, waxaana shaacisay in askar ka tirsan ciidamada Uganda ay ku dileen, kuwa kalena ay ku dhaawaceen.

Int badan kooxda Al-Shabaab ayaa weeraro jidgal ah ku qaada ciidamada Xoogga dalka iyo kuwa ATMIS, ex AMISOM xilliyada ay isaga kala gooshayaan koonfurta & bartamaha dalka.

The post Ciidamada UGANDA oo khasaare lagu gaarsiiyey qarax ka dhacay MARKA appeared first on Caasimada Online.